WAYAK LAMPUNG

Wayak: "Jagung Lupa Dibasung"

by Hendrik Semaka 

Bismillah, awal mula.

Ajo wayak tisusun.

Tabikpun ngalampukha.

Lain ki sakking buyun..

Temondo pay puakhi.

Tawwai ni tuyuk tamong.

Tulung jak kanan kikhi.

Dang lebon, jadi hakhong..

Ingok sapa penulung.

Dang pandang tuha ngukha.

Jagung lupa dibasung.

Lupa lagi sengsakha..

Nulung kaci tesettik.

Sekiman anjak tumbay.

Lagi lunik ti suppik.

Balak ya, ngekhoh nyagai..

Khettak lupa dibawak.

Wayit lupa junjungan.

Tekabok kilu injak.

Yamula kecadangan..

Keminan khek kemaman.

Dang titawak ki khiya.

Khuyuh mak jadi haban.

Ki gelluk kham ngubat ya..

Ketubbang nungga bangik.

Ingok, asal kham saka.

Bubagi kipak cutik.

Sejjakh ingok kham dia..

Mak mingan ngeni khupa.

Kantu bakhang ni mawat.

Sejjakh kipak tenaga.

Ketubbang lagi kuwat.

Say ngeni tilah khila.

Pak cutik mak sebinjik.

Kidang sangun manusia.

Isi lupa di kulik..

Lain ki hingga tuha.

Nawwai kitik bulangui.

Ajo guwai kham ngaca.

Dang manuk lupa tallui..

Lain ki saking nalom.

Mula wayak ti sani.

Jo bingi khadu khelom.

Wayak, "sampai disini"

ha.ha.haaa...

Tabikpun...

Bekasi, april 2011