My Facebook and Twitter

My Facebook

My Twitter

"TUKANG KOPERASI"

Meizianazi Putra 

Awal Mula Sai pertama

Ram haga ngaji Diri

Payu ram lalang Waya

Dang Kik Sasebik Di hati

Sinji Cuma Segata

Liwan helau isini

Kintu Wat sai mak nerima

Kilu maaf nihan puari

Bukisah jelma lima

Midor Mid Pekon Dudi

Niat lapah Usaha

Sandang tedos bangik Sakikni

Sesampai Tyan Di jawa

Utok pusing repa hagukni

Haga Bubindom Di Dipa

jaoh Jak minak muari

Lapah nyepok Sugeh rencaka

Tagan Ana pak koperasi

Sai penting mulang kak buka

Adu tantu Nihan Wat hasilni

Kapan Tiyan kak bucerita

Liwan helau bangikni Di Dudi

Sapa Sai mawat percaya

Ajo Tiliak nihan buktini

Tongkrongan motor Ninja

Emas inton Di kanan kiri

tagan Ana pak Tang Sita

Penting Bugaya pai Buka Sinji

Cuba kik ram Sai nanya

balak kudo tarek'an ketti

jawab Ni Tiyan Lima

Rua juta tiap rani

Lamon Nihan Sai tikena

Halus cawa kena Di budini

nangguh Tyan Di ulun tuha

haga nutuk mak Sdi hani

Ulun Tuha mak kecewa

Asal tantu Di hasilni

Sabah Sai hahana

Tijual pakai Modalni

Cukup pai Antak ija

Segata Di BINGI rani

Sinji Hiburan Semata

Maaf Kik Wat Salahni... 

Nyin Lalang : Pak Lunek Benu

By Hasim on Thursday, March 8, 2012

Pukokni kik aga sababalak awak mak ngedok sai dacok ngalahko Pak Lunek Benu. Kik adu ngicik iya layin begawoh. Injuk iya unyin sai calak. Injuk iya pandai unyin isini di dunia ji. Kidang dunia ni mak hak lebeh jak tukuni pekon seno do. Pukokni, ani jalma kamno, ancak iya ngunjakko kicik jak ngunjakkko jinjongan.

Unyinni jelma sang pekon adu jak diawak-keni. Kidang tanno ulun adu pandai unyin. Ulun adu pandai kaghtuni. Kik sa gila agi lamondo ulun sai tiangah ngedengiko kicikni. Agi lamon do ulun sai peghcara. Ya tanno makngedok lagi sai nyemangogh keni. Ulun adu pandai unyinni. Mak ngedok pasni. Beladi sa’ayayapan ghiya.

Kidang injukni iya juga adu pandai jelma sang pekon mak aga lagi ngedengiko kicikni. Tanno kik ngicik jama jelma sang pekon iya mulai buyun-uyun. Halok mak mebangek lagi dighasani kik dikemitko ulun.

Kidang dang cuba-cuba kik betungga jelma jak luagh. Jadi santapanni do diya. Peghnah waktu nyak mulang jak midogh, nyak menok Pak Lunek Benu lagi asik ngobrol di papanca jama jelma sai, induh jelma jak ipa bakas seno. Pak Lunek Benu sanemon buceghita, bakas seno tiangah ngedengini. Kena niku mamak aku delom hati, sambil nyak liyu.

“Tiap ghani ngia nyak nyumbangko ghah-ku,” ani Pak Lunek Benu sai kudengi. Kiamat aku delom hati, gheno kik hibatni kudo. Tiap ghani nihan iya nyumbangko ghahni mik PMI. Kidang induh kuk iya pandai induh mawat ghepa caghani nyumbangko ghah sa.

“Sangun gaguwaiko do kik seno,” ani muneh. Mak dihaghi keni nyak lalang dilom hati. Keliwatan ‘awakni Pak Lunek Benu ji, aku delom hati.

Kadu mak saka jak seno bang bakas saiya singgah muneh di lamban, nanya bakku.

“Bak lagi di sabah,” aku jama iya.

“Kapan iya mulang?” ani.

“Induh. Biasani dibi. Jam lima. Kak adu aga magghib,” aku.

“Payu kik gheno ucakko gawoh jama iya. Jemoh nyak ghatong luwot,” ani.

“Payu. Kemak gila tunggu pai. Halok saghebok lagi iya mulang.”

“Ikin gawoh ajo adu manom.”

Kak jemohni iya ghatong do. Kebetulan bak lagi wat di lamban. Ya ghadu jak basa-basi seghebok ghek ngenalko dighini, bakas saiya nyampaiko maksudni.

Ajo gheji pekni Pak Lunek,” ani jama bak. “Maksudku mik dija ji nyak aga katulungan. Kidang nyak ji mak kik pandai ga ngicek. Mak nyak pandai caghani kik aga bubasa-basi. Kintu teghus teghang gawoh, ajo sekam ghua ji adu saka tibulamban, adu pitu tahun. Kidang mak kung ngedok uleh. Mak kung ngedok ketughunan. Ajo kudengi jak Pak Lunek Benu di kabelahno, niku pandai ngelulahni. Ngilu tulung pai nihan ajo,” ani.

“Kacah …” ani bak tikanjat. “Mak nyak pandai kik guwai maghagheno. Kintu guwaiku ji mik sabah, ngababalek duniaji, ghek segok di lom pulan ji, ngekui batangni damar. Mak nyak pandai kik aga guwai injuk gheno.” Ani bak muneh.

“Adu diayabko Benu diya niku ji. Dang melamon ga ngicek jama Benu di. Iya udi senangun geghing ayayapan.”

“Ghiya kiya. Na api ngiya guwai sinji,” ani bakas saiya tikanjat.

“Ngilu maaf nihan ajo Pak Lunek,” ani sambil iya nangguh mulang, ghek busalam jama bak.

“Sik nina ni Benu,” ani bak, nginah bakas saiya adu lijung.